Hljómsveitin Hellvar er á leiðinni til Bandaríkjanna í stutta tónleikaferð þar sem hún spilar í norðurhéröðum New York-fylkis áður en hún leikur í New York-borg þann 9. ágúst. Hellvar mun nær eingöngu leika lög af komandi stórri plötu sinni en læðir þó inn einu og einu lagi af frumrauninni “Bat Out Of Hellvar” sem kom út 2007. Þetta er í annað sinn sem Hellvar spilar í New York-fylki en þangað fór sveitin haustið 2007, og spilaði í borgunum Chatham, Troy og Albany. Nú hefur hljómsveitinni verið boðið að leika á Hudson Harbor Fest þann 7.

ágúst, en það er menningarhátíð Hudson-borgar sem haldin er árlega niðri við Hudson-á. Þar mun Hellvar spila ásamt harðkjarnasveitinni Cosmopolitan  frá Kalíforníu. Hellvar leikur svo á  tvennum tónleikum til viðbótar í Hudson, á sænska veitingastaðnum DABA þann 5. ágúst og á Musica Loft þann 8. ágúst.

Í New York-borg spilar sveitin á Party Expo í Brooklyn með hljómsveitunum Small Devices, Soft Skin og Great Tiger!

Hellvar hefur fram til þessa verið kvartett og fimmti meðlimurinn verið í formi trommuheila en á vormánuðum 2010 var lifandi trommuleik bætt í sveitina með tilkomu hins mjög svo lifandi trommuleikara Ólafs Ingólfssonar. Stífar æfingar hafa því verið í gangi til að þétta og fullgera hljóminn, ásamt því að klára að semja og útsetja næstu plötu.

Við heimkomu heldur hljómsveitin í hljóðver, fersk úr ferðalaginu, til að taka upp nýja efnið.

Sönkonan Madonna er sögð vera að leggja af stað í nýja tónleikaferð sem sækir innblástur í uppvöxt hennar í New York. Tónleikaferðin mun hefjast í haust og standa yfir í um hálft ár. Madonna hélt prufur í London í síðustu viku fyrir dansara sem eiga að taka þátt í ferðinni og gengu þær vel. „Þetta verður stærsta og óvæntasta tónleikaferð hennar til þessa,” sagði heimildarmaður. „Hún ætlar að snúa sér að rótum sínum úr New York með hip hop-áhrifum og leggur mikla áherslu á flott dansatriði.” Það má búast við að aðsókn á tónleika með sönkonunni verði mikil en Madonna þénaði 408 milljónir dollara á síðustu tónleikaferð sinni Sticky & Sweet.

Eins og allir vita hefur RÁS 2, útvarp allra landsmanna, staðið fyrir stærstu tónleikum ársins, STÓRTÓNLEIKUM RÁSAR 2 Á MENNINGARNÓTT, undanfarin ár.

Í ár verða að sjálfsögðu tónleikar með frábærri dagskrá og núna á besta stað í bænum – við Arnarhól. Nú er hins vegar kominn tími til að gefa tónleikunum nýtt alvöru nafn og af því tilefni er efnt til hugmyndasamkeppnni meðal hlustenda Rásar 2. Tillögu að nafni senda landsmenn á netfangið menningarnott@ruv.is og nýtt nafn STÓRTÓNLEIKA RÁSAR 2 verður svo kynnt strax eftir verslunarmannahelgi, ásamt upplýsingum um flytjendur á tónleikunum.

Frestur til að senda inn nafn rennur út einni mínútu fyrir miðnætti á frídegi verslunarmanna, þann 2. ágúst nk. Sá/sú sem kemur með bestu tillöguna fær að launum heimsókn frá Ingó Veðurguði sem mætir til sigurvegarans vopnaður gítar og söngrödd. Einnig fær viðkomandi Nokia 5230 3G síma frá Nova, sjóstangveiðisiglingu og kvöldverð fyrir allt að 10 manns á sjóstangveiðiskipinu Andreu.

Rás 2 hefur ávallt lagt sig fram við að bjóða upp á magnaða dagskrá á Menningarnótt og á undanförnum árum hafa spilað hljómsveitir eins og Mannakorn, Mínus, Egó, Tobmobile, Stuðmenn, Sálin, Páll Óskar, Veðurguðirnir, Papar, Lights On The Highway, Í Svörtum Fötum, Írafár, Brimkló, Þursaflokkurinn, Quarashi, Ljótu Hálfvitarnir, KK & Maggi ofl.

Poppland hvetur landsmenn til að taka þátt með því að senda tillögu að nýju nafni á netfangið menningarnott@ruv.is

Bandarísku rokkararnir í Kings of Leon lentu í því að dúfur stöðvuðu tónleika þeirra í St. Louis um helgina. Bandið var búið að leika nokkur lög þegar þeir fengu nóg af dúfum sem höfðu hreiðrað um sig fyrir ofan sviðið. Fiðurfénaðurinn mun ekki hafa gert sér grein fyrir að stórstjörnur voru á sviðinu og skitu því ítrekað á sviðið og um leið á meðlimi sveitarinnar.

Fyrst um sinn létu Kings of Leon sér fátt um finnast og héldu áfram að leika útataðir í saurnum en þegar bassaleikarinn Jared fékk eina slummuna beint upp í sig var þeim nóg boðið. Fóru Kings og Leon af sviðinu eftir þetta og snéru ekki aftur, enda væntanlega með óbragð í munni.

Í tilkynningu á Twitter síðu sinni báðust Kings of Leon afsökunar á þessu en tóku fram að það væri fyrst og fremst við tónleikahaldarann að sakast.

Lay Low, Moses Hightower, Evil Madness, Pascal Pinon og sigurvegarar Músíktilrauna Of Monsters and Men meðal þeirra sem bætast við dagskrá Innipúkans.

Innipúkinn tónlistarhátíð fer fram í níunda sinn í Reykjavík um Verslunarmannahelgina. Dagskráin í ár er einstaklega fjölbreytileg en þær sveitir sem staðfest er að komi fram á Innipúka-hátíðinni í ár má sjá hér að neðan. Vel má vera að nokkrar fleiri verði kynntar þegar líður á vikuna.

Í gegnum tíðina hefur jafnan myndast mikið stuð á Innipúkanum, enda hafa hafa margir af fremstu tónlistarmönnum landsins leikið á hátíðinni – auk skemmtilegra erlendra gesta. Innipúkinn 2010 fer fram á tónleikastöðunum Sódóma og Venue, sem standa hlið við hlið á Tryggavötunni, auk Naustins milli Tryggavötu og Hafnarstrætis sem lokað verður fyrir bílaumferð.

Naustin á milli Tryggvagötu og Hafnarstrætis verður lokað fyrir bílaumferð á meðan tónlistarhátíðin stendur yfir og þar mun fara fram sjóðheit dagskrá og gamlir kunningjar líkt og pop-quiz, tónlistarmarkaður og veitingasala verða á svæðinu.

INNIPÚKINN 2010 – LISTAMENN OG HLJÓMSVEITIR

(Bold: nýjar viðbæður)

Árstíðir,

Berndsen

Drama King

Evil Madness

Hudson Wayne

Jan Mayen

Lay Low

Markús & the diversion sessions

Me, the slumbering Napoleon

Morðingjarnir

Moses Hightower

Mr. Silla

My summer as a Salvation Soldier

Nóló

Nóra

Of Monsters and Men

Ojba Rasta

Orphic Oxtra

Pascal Pinon

Quadroplus

Raggi Bjarna & hljómsveit

Retró Stefson,

Snorri Helgason

Sóley

Stafrænn Hákon

Útidúr

+ e.t.v. fleiri….
MIÐASALA
Miðaverði á Innipúkan er stillt í hóf og er aðeins 2.900 kr. fyrir alla þrjá dagana. (armband)
Miðasala er á Midi.is og versluninni Havarí, Austurstræti.

Hljómsveitin AC/DC hefur síðastliðin tvö ár troðið upp víðsvegar um heiminn í tónleikaför sinni Black Ice.  Sveitin hélt 168 tónleika sem 4,9 milljón manns sóttu og gáfu af sér 441,6 milljón dollara.  Þessi mikla aðsókn á tónleika sveitarinnar hefur komið þeim á spjöld sögunnar því þetta er næst stærsta tónleikaferð sögunnar á eftir Rolling Stones túrnum A Bigger Bang.  Sá túr stóð yfir frá árinu 2005 til 2007 með 147 tónleikum sem Stones fengu 558,3 milljónir dolllara fyrir.

Samkvæmt heimildum Billboard tók það AC/DC átta ár að semja lög á síðustu plötuna þeirra og því var undirbúningurinn fyrir tónleikaferðina Black Ice góður.  Angus Young og Malcom Young fengu á dögunum í Sidney í Ástralíu viðurkenningu sem lagahöfundar ársins.  Þeir bræður tók líka við verðlaunum fyrir lagið Rock N Roll Train, sem er eitt mest spilaða lagið í Ástralíu.  Platan Black Ice kom út árið 2008, náði 1. sæti í 27 löndum,  seldist í meira en 1.700.000 eintökum fyrstu vikuna og alls í 7 milljónum eintaka.

Orri Harðarson hefur sent frá sér nýtt lag sem er undanfari fimmtu plötu tónlistarmannsins. Lagið, sem heitir Perfekt par, var frumflutt í Popplandi fimmtudaginn 22. júlí en platan mun bera nafnið Albúm og er væntanleg í september.

Þessi fimmta sólóplata Orra er sérstök fyrir þær sakir að allur undirleikur á henni er handspilaður á einn og sama kassagítarinn. Þrátt fyrir að í ár séu liðin 25 ár síðan Orri kom fyrst fram opinberlega, vopnaður kassagítar, er þetta í fyrsta skipti á hljómplötuferli hans sem slíkur gítar er í aðalhlutverki.

Fimm ár eru liðin síðan Orri sendi síðast frá sér plötu, en þá var plata hans „Trú“ tilnefnd til Íslensku tónlistarverðlaunanna sem „plata ársins.“ Áður hafði Orri sent frá sér hljómplöturnar „Drög að heimkomu,“ „Stóri draumurinn“ og „Tár,“ en fyrir þá fyrstu var hann útnefndur „nýliði ársins“ á Íslensku tónlistarverðlaununum. Auk áðurnefndra sólóplatna hefur Orri komið að vinnslu á tugum íslenskra platna, sem upptökustjóri, útsetjari, hljóðfæraleikari og tæknimaður.

For a Minor Reflection sendu frá sér nýja breiðskífu á dögum sem nefnist “Höldum í átt að óreiðu”. Af því tilefni efnir hljómsveitin til útgáfutónleika laugardaginn 24. júlí nk. í Iðnó. Öllu verður tjaldað til og fær hljómsveitin til liðs við sig ýmsa hljóðfæraleikara, m.a. hluta þeirra sem tóku þátt í upptökum á plötunni.

…Á tónleikunum verða einnig frumflutt ný vídeóverk sem hafa verið unnin fyrir hljómsveitina.

John Rixon er virtur listamaður í Bretlandi og hefur meðal annars sýnt hjá Tate Gallery í London. John hefur unnið með fjölda tónlistarmanna í gegnum tíðina og skapar þannig hljóðverk við vídóverk sín. Þegar hann heyrði plötuna frá For a Minor Reflection í vor bað hann um að fá að vera verk við lagið Sjáumst í Virginíu og verður það frumsýnt á útgáfutónleikunum. Auk þess verða sýnd 3 önnur verk sem gerð hafa verið af nemendum hans og eitt af ítölskum leikstjóra að nafni Lorenzo Fonda.

For a Minor Reflection tóku þátt í Inspired by Iceland tónleikunum á dögunum og var tekið upp vídeó við lagið Dansi Dans á Hellnum sem sjá má hér http://vimeo.com/13008573
Lagið hefur vakið töluverða athygli í Bandaríkjunum en það var meðal annars á safndisknum Made in Iceland III sem kynntur hefur verið á háskólastöðvum í Bandaríkjunum.

Kvartettinn Bossanova mun taka á móti gestum með ljúfum tónum frá opnun hússins og fram að tónleikunum sjálfum sem byrja 21.00.

Miðaverð á tónleikana í Iðnó er 1.500 krónur og forsala miða fer fram í Smekkleysu.

Hljómsveitin Nóra spilar á tónleikum í plötubúðinni Havarí kl. 17:30 í dag og verður frítt inn. Nóra verður svo á Faktorý um kvöldið ásamt Valdimari.

Svavar Knútur, söngvaskáld og hamingjubjörn, heimsækir sunnanverða Vestfirði um helgina. Svavar byrjar í Sjóræningjahúsinu á Patreksfirði í kvöld kl. 21 en Árstíðir verða á sama stað á morgun . Á laugardag, ætlar Svavar Knútur að heimsækja Tálknafjörð og um kvöldið mun hann leika fyrir gesti Skrýmslasetursins á Bíldudal

UMTBS verður svo á Dillon í kvöld ásamt góðum vinum. Frítt verður inn. Á græna hattinum verður Moses Hightower ásamt Dísu Jakobs og hljómsveit í kvöld. Búðabandið snýr síðan aftur á Prikið eftir langa fjarveru og skemmtir sér og gestum Priksins í kvöld og á morgun. Fjörið hefst kl. 22:00 bæði kvöldin.

Benni Hemm Hemm, Retro Stefson, Miri og Snorri Helgason halda svo áfram ferðlagi sínum með Sumargleði Kimi Records. Í dag er það Hvammsvík í Hvalfirði en á morgun verða sömu sveitir á Faktorý (gamla Grand Rokk) í miðbæ Reykjavíkur.

Á morgun verða svo líka Útgáfutónleikar For a Minor Reflection í Iðnó. Aðgangseyrir er 1.500 krónur og forsala miða fer fram í Smekkleysu.

Mugison, Pétur Ben, Lára Rúnars og hljómsveitin Pollapönk munu troða upp á morgun laugardag, hvert í sínu lagi, og hvert með öðru, á tónlistarhátíð sem haldin verður á Hótel Laugarhóli í Bjarnarfirði á Ströndum. Enginn aðgangseyrir er að hátíðinni og allir velkomnir, börn og fullorðnir.

Hótel Laugarhóll er heimilislegt sveitahótel rétt norðan Hólmavíkur og með nýjum vegi um Arnkötludal frá mynni Gilsfjarðar yfir á Strandirnar er þetta skottúr af Höfuðborgarsvæðinu. Um álíka langan veg er að fara frá Ísafirði.

Það þarf svo vart að taka fram að bræslan á Borgarfirði Eyrstra fer fram um helgina. Rás 2 mun senda beint út frá hátíðinni frá kl. 20:00 á morgun.

Innipúkinn fer fram umVerslunarmannahelgina og Raggi Bjarna ætlar að troða upp ásamt hljómsveit. Raggi er spenntur fyrir að koma fram á Innipúkanum og mun æfa sérstakt prógram fyrir tónleika sína á hátíðinni. Raggi fylgir þar með í fótspor ekki ómerkari manna en Ómari Ragnarssyni, Gylfa Ægissyni, Bjartmari Guðlaugs, Megas, Hjaltalín, Hjálmar, Trabant, Mínus, Mugison og öllum þeim aragrúa listamanna sem komið hafa fram á Innipúkanum síðustu ár.

Nokkrar erlendar hljómsveitir hafa komið fram á Innipúkanum í gegnum tíðina og má þar nefna Cat Power, Blonde Redhead, Television, Jonathan Ritchman og The Raveonettes. Fyrir tveim árum var hins vegar tekin sú stefna að láta íslenska tónlistarmenn um bera uppi fjörið, með tilheyrandi hliðardagskrá og glensi – sem hefur gefið virkilega góða raun. Uppselt var á Innipúkan í fyrra, gleðin mikil – og nú er ætlunin er að endurtaka leikinn með svipuðum hætti. En auðvitað nýrri tónleikadagskrá.

Aðrar sveitir sem staðfest er að komi fram á Innipúka-hátíðinni í ár eru; Árstíðir, Berndsen, Jan Mayen, Markús & the diversion sessions, Me, the slumbering Napoleon, Mr. Silla, Nóra, Nóló, Ojba Rasta, Retró Stefson, Retron og Snorri Helgason.
Innipúkinn hefur gengið í gegnum ýmsar útgáfur síðan hún var fyrst haldin árið 2002 og fer hátíðin nú fram í níunda sinn. Líkt og í fyrra stendur Innipúkinn yfir í þrjá daga; hefst föstudaginn 30. júlí -og lýkur 1. ágúst. Fyrir valinu sem heimili Innipúkans í ár eru tónleikastaðirnir Sódóma og Venue, sem standa hlið við hlið á Tryggavötunni, auk Naustins milli Tryggavötu og Hafnarstrætis sem lokað verður fyrir bílaumferð. Sódóma hefur síðastliðið ár verið eitt helsta vígi lifandi tónlistar í Reykjavíkurborg og var ásamt Batteríinu (sem nú heyrir sögunni til) heimili Innipúkans í fyrra, en Venue opnaði nýverið sem nýr tónleikastaður. Staðirnir henta einkar vel til tónleikahalds, eru nánast á sitt hvorri hæðinni í gamla Gaukur á Stöng-húsnæðinu við Tryggvagötuna og liggja því einkar vel við höggi.